Wasay-Wasay By Piux Cabahar

Gumonhap nga sulbaron kining gugma sa tawo.
Mithi nga tolokibon sama sa anak sa damgo.
Malisud nga tugkaron daw bung-aw nga mangitngit.
Ang kangiub kon linglingon
daw humalatag sa mga kasakit.

Ang mga pasiklap sa malulot ninyong tinan-awan
Daw sa maidlot nga punyal nga mi lagbas
sa himalatyon kong kasingkasing ug kalag.
Ang inyong pahiyom nga inuslan lang sa tagalangit
Maghugas sa mga dag-um sa akong kasakit.

Damgo ang kinabuhi, damgo ang himaya.
Damgo, damgo ang gugma,
Damgo, damgo ang tanan.
Ug ang mga pasiklap sa malulot ninyong tinanawan
Damgo damgo diay lamang. O damgong buutan!

Ah! Ako’y kahoy’ng lubay lubay
Una mapilay apan uraray
Una mapukan apan dihingan
Una molaylay apan inanay
Una mapusgay apan sa hinay.